काठमाडौं । नेपाल राष्ट्र बैंकले यस वर्ष दशैँमा नयाँ नोट नसाट्ने भएको छ । राष्ट्र बैंकले खर्चको व्यवस्थापन गर्न भन्दै नयाँ नोट सटही बन्द गरेको हो । यो वर्ष दशैँमा आवश्यक हुनेलाई बजारबाट फिर्ता आएकामध्येबाट सुकिला नोट दिने तयारी गरिएको राष्ट्र बैंकले जनाएको छ ।

डिजिटल कारोबारलाई प्रोत्साहन गर्न र नोट छपाइ खर्च कम गर्न यस्तो निर्णय गरेको बैंकका सहायक प्रवक्ता डा।डिल्लीराम पोखरेलले बताए । उनका अनुसार दशैँमा साना तथा ठूला दरका नोट आवश्यक हुनेलाई एक वर्षअघि बजारमा पठाएर फिर्ता आएका सुकिला नोट बैंकमार्फत सटही गरिनेछ ।

दशैँका लागि ५, १० २०, ५० र १०० का नोट सटहीको सुविधा दिँदै आएको राष्ट्र बैंकले यो पटक यसैअनुसार सटहीको सुविधा दिने छ । यो वर्ष पनि प्रतिव्यक्ति १८ हजार ५०० कै हाराहारीमा सुकिला नोट सटही गर्ने बैंकले जनाएको छ ।