
काठमाडौं । नेपाल चिकित्सक संघले देशभरका स्वास्थ्य संस्थाहरूमा आज आइतबार आकस्मिकबाहेक सबै सेवा बन्द गर्दा बिरामीहरु अत्यावश्यक उपचार पाउनबाट वञ्चित भएका छन् ।
गत बुधबार हेटौंडास्थित सन्चो अस्पतालमा कार्यरत डा. विकास थापा र डा. प्रशान्त विडारीमाथि बिरामीका आफन्तबाट भएको कुटपिटको घटनामा संलग्नलाई पक्राउ गरी कारबाही गर्न माग गर्दै नेपाल चिकित्सक संघको आह्वानमा ओपीडी सेवा बन्द गरिएको हो ।
उक्त घटनामा संलग्न दोषीहरूलाई छानबिन गरी कारबाही गर्न र देशभरका स्वास्थ्य संस्थाहरूमा अनिवार्यरूपमा स्वास्थ्य संस्था सुरक्षाबलको व्यवस्था गर्न संघले माग गरेको छ ।
संघले डाक्टरहरुलाई कुटपिट गर्नेहरुलाई ७२ घण्टाभित्र कारबाहीको दायरामा ल्याउन माग गरेको थियो । तर, सरकारले कारबाही नगरेको भन्दै संघले आज आइतबार सबै स्वास्थ्य संस्थाहरुमा आकस्मिकबाहेकका सेवा बन्द गर्ने गरेको हो ।
गत साउन २२ गते डेंगुको लक्षण लिएर हेटौंडाको सन्चो अस्पतालमा उपचारका लागि ल्याइएका बिरामीलाई डाक्टरहरुले साउन २३ गते नै अर्को अस्पताल रेफर गरेका थिए । ती बिरामीको साउन २५ गते मृत्यु भएको थियो । त्यसपछि मृतकका आफन्तले पहिला गएको सन्चो अस्पतालले नै राम्रोसँग उपचार नगरेको आरोप लगाउँदै क्षतिपूर्तिको माग गर्दै डाक्टरमाथि कुटपिट गरेका थिए ।
कुटपिटमा संलग्न भएको आरोपमा प्रहरीले चार जनालाई पक्राउ गरेको छ । डाक्टरहरुलाई कुटपिट गरेको आरोपमा पक्राउ परेका रमा प्रधान, रमिता प्रधान, रोहित प्रधान र अनुप प्रधानमाथि अनुसन्धान गर्न जिल्ला अदालत मकवानपुरले प्रहरीलाई भदौ २९ गते तीन दिनको म्याद दिएको थियो ।
रातो चन्द्रसुर्य डेस्क
प्रकाशित: ३१ भाद्र २०८०, आईतवार ११:०७
“केपी ओली बुबाजस्तै हुनुहुन्छ भने बालेन उनका छोराजस्तै”-शेखर वाग्ले

विश्वका करिब एक अर्ब मानिस पानी सङ्कटको चपेटामा

एमसिसी परियोजना फेरि अगाडि बढाउन अनुमति

सम्पर्कविहीन १६ प्रहरीलाई सात दिनभित्र हाजिर हुन निर्देशन

राष्ट्रिय महिला फुटबल प्रतियोगिताको उपाधि एपीएफलाई

पोखरीमा डुबेर एक बालकको मृत्यु
